السلام عليكم طلبا للاخت ام سلمى هاهي حلوة ساهلة رخيصة ب 49 درهم لمناسابات اخر الشهر ههههههه
المقادير
كريم شنتي 20dh *
2 بيمو صابلي 4dh*
2 اوراق جيلاتين 3dh*
قهوة 2 معالق فابور*
فنيدات دراجي 7dh*
شكلاط حسب الذوق 5dh*
لوز 10dh*
وا كيجاتكم الميزانية هههههه قد قد
دابة ندوزو للطريقة ساهلة ولكن خاص يكون عندك هاد القالب
و متنسايش تلبسي هاد القالب الورق الشفاف سيلفيريزي باش ميلسقش مع الكريم من بعد
كتحطي القالب فوق صحن التقديم و كتبداي تستفي في بيمو و تقطعيه باش تفرشيه مزيان وسط القالب
ويلا معندكش راه تقدري ديباني اول مرة ب مول ديال جاج بحال هاكة
--------------------------------
من بعد كديري كسرونة فيها كاس ماء و ديري معاه القهوة و سنيدة و تخليهم يدوبو
و سقي بيهم هداك بيمو باش يرطاب شوية عنداك تمشي تفزكيه بزاف تيولي يتفرتت
و ف بانيو ديري كريم شونتي و ضيفي عليه
* شكلاط مقطع طروفة صغار
* لي دراجي مقطعين
* لوز مهرمش او مقطع صغير
و خلطي كلشي مزيان فالبانيو
ديري اوراق الجيلاتين ف حمام مريم تايدوبو و خلطيهم مع الكريم
و ديري الكريم بجميع العناصر فوق هاداك بيمو و دخليه للمجمد
و خليه مدة تايجمد و هاية عندك حلوي كلاصي ب 49 درهم تقدري تزوقيها كيما بغيتي من الفوق و تكتبي فيها اللي بغيتي
و بالصحة و الراحة
كنتسني اراءكم عنداك دخلو و تخرجو بلا ماتقولولي رءيكم